ក្លឹបមាន់ខ្នាយមាស Tottenham Hotspur បានប្រកាសជាផ្លូវការ កាលពីថ្ងៃអង្គារ អំពីការបន្តកុងត្រាថ្មីសម្រាប់ខ្សែប្រយុទ្ធឆ្នើមកូរ៉េខាងត្បូង Heung-Min Son ជាមួយសុពលភាពរហូតដល់ខែមិថុនា ឆ្នាំ២០២៦ ដោយធានាថាប្រធានក្រុមវ័យ ៣២ឆ្នាំរូបនេះ នៅតែស្ថិតក្នុងក្លឹប ទោះបីជាមានពាក្យចចាមអារ៉ាមចាប់អារម្មណ៍ពី Barcelona យ៉ាងណាក៏ដោយ។
មួយទស្សវត្សរ៍ជាមួយក្លិប៖ខ្សែប្រយុទ្ធវ័យ៣២ឆ្នាំរូបនេះ Heung-Min Son បានចូលរួមជាមួយក្លិប Tottenham Hotspur នៅខែសីហា ឆ្នាំ២០១៥ ក្នុងតម្លៃ ២២លានផោនពី Bayer Leverkusen។ តារាជើងស៊ុតអាស៊ីរូបនេះ គឺជាតួអង្គសំខាន់សម្រាប់ក្រុម ហើយការបន្ថែមកុងត្រាថ្មីនេះបង្ហាញថា Son នៅតែជាជម្រើសសំខាន់របស់គ្រូបង្វឹក Ange Postecoglou ក្នុងស្ថានភាពដ៏លំបាករបស់ក្រុមក្នុងរដូវកាលនេះ។ ចាប់តាំងពីចូលរួមជាមួយក្រុម Spur ម្ចាស់អាវលេខ៧ រូបនេះបានលេងសរុបចំនួន ៤៣១ ដងសម្រាប់ក្រុមមានមូលដ្ឋាននៅទីក្រុងឡុងន៍ និងស៊ុតបញ្ចូលទីបាន ១៦៩គ្រាប់ ដែលជាកីឡាករស៊ុតបញ្ចូលទីច្រើនបំផុតទី៤ ក្នុងប្រវត្តិសាស្ត្រក្លឹប។
កីឡាករអាស៊ីដំបូងឈ្នះស្បែកជើងមាសនៅ Premier League៖ Heung-Min Son រកបាន ១២៥គ្រាប់នៅ Premier League ដែលធ្វើឱ្យគាត់ក្លាយជាកីឡាករអាស៊ីដំបូងគេក្នុងប្រវត្តិសាស្រ្តលីគកំពូលអង់គ្លេស។ ប្រធានក្រុម Tottenham Hotspur រូបនេះក៏បានឈ្នះស្បែកជើងមាសចំនួនមួយលើកផងដែរ ដោយរកបាន២៣គ្រាប់ដូចគ្នាជាមួយ Mohamed Salah ក្នុងរដូវកាល ២០២១-២២។
ស្ថានភាពក្រុមនៅ Premier League៖ បច្ចុប្បន្នជាប្រធានក្រុម Tottenham លោក Son នៅតែជាកីឡាករឆ្នើមម្នាក់ទោះបីជាក្រុមមានការលំបាកយ៉ាងណាក៏ដោយ។ Spurs ឈរនៅលេខរៀងទី 12 ក្នុងក្របខ័ណ្ឌPremier League ដោយ Son ស៊ុតបញ្ចូលទីបានត្រឹមតែ 5 គ្រាប់ប៉ុណ្ណោះ និងបញ្ជូនបាល់ឱ្យមិត្តរួមក្រុមបាន ៦លើក ក្នុងការបង្ហាញខ្លួន ១៧ប្រកួត។ កិច្ចសន្យាបន្តរបស់គាត់បញ្ជាក់ពីការពឹងផ្អែករបស់ក្លឹបលើបទពិសោធន៍ និងភាពជាអ្នកដឹកនាំរបស់គាត់ នៅពេលដែលពួកគេរុករកយុទ្ធនាការដ៏លំបាកនេះ។
