ព្រះខ័នរាជស្វាយរៀង បញ្ចប់កំណត់ត្រាមិនចាញ់សោះរបស់ភ្នំពេញក្រោន រដូវកាលនេះ និងបណ្ដេញពិន្ទុត្រឹម១ពិន្ទុប៉ុណ្ណោះ

ព្រះខ័នរាជស្វាយរៀង បានបញ្ចប់កំណត់ត្រាមិនចាញ់សោះក្នុងរដូវកាលនេះ របស់ភ្នំពេញក្រោន ក្នុងជំនួប Cambodian Premier League សប្ដាហ៍ទី១៩ នៅកីឡដ្ឋានខេត្តស្វាយរៀង ដោយលទ្ធផល ៣-១ ដែលធ្វើឱ្យពួកគេ តាមពីក្រោយក្រុមកំពូលតារាងសល់ត្រឹម ១ពិន្ទុប៉ុណ្ណោះ។

សង្ខេបពីការប្រកួត៖ ព្រះខ័នរាជស្វាយរៀង ចាប់ផ្ដើមយ៉ាងល្អដោយវាយសម្រុកទៅលើក្រុមភ្ញៀវភ្នំពេញក្រោន និងរកបានគ្រាប់បាល់នាំមុខមុន នៅនាទី ទី៩ ដោយខ្សែប្រយុទ្ធ ញាណ សុស៊ីដាន់ ហើយភ្នំពេញក្រោន បានតាមស្មើវិញនៅនាទីទី៣៦ ដោយខ្សែប្រយុទ្ធហូឡង់ Jelle Goselink ពីការទាញផុតរនាំងការពាររបស់ម្ចាស់ផ្ទះ។ ការប្រកួតចូលមកដល់វគ្គទី២ ព្រះខ័នរាជស្វាយរៀងព្យាយាមវាយសម្រុកមកវិញជាច្រើនលើក ដើម្បីរកគ្រាប់បាល់ ហើយនៅនាទីទី៥៤ ខ្សែការពារ យើ មូស្ល៊ីម របស់ភ្នំពេញក្រោនបានទទួលកាតក្រហមពីការរបង្ករកំហុសលើ Nick Tylor។ ការប្រកួតបានផ្លាស់ប្ដូរខ្លាំង ក្រោយពីក្រុមភ្ញៀវ បានបាត់បង់កីឡាករម្នាក់ ដោយស្វាយរៀង រកបាន ២គ្រាប់បាល់បន្ថែម ដើម្បីធានាជ័យជម្នះ ពីការទាត់បញ្ចូលទីដោយខ្សែប្រយុទ្ធប្រេស៊ីលទាំងពីរ Gabriel Silva និង Pablo ។

បច្ចុប្បន្នភាពតារាងចំណាត់ថ្នាក់៖ ភ្នំពេញក្រោន បន្តឈរនៅលើកំពូលតារាងដោយមាន ៤៤ ពិន្ទុ តាមពីក្រោយត្រឹមមួយពិន្ទ ពីក្រុមលេខ២ ព្រះខ័នរាជស្វាយរៀង ដែលមាន៤៣ពិន្ទុ និងវិសាខា មាន៣៨ពិន្ទុដដែល ក្រោយចាញ់ក្រុមលេខ៧ អាយអេសអាយ ៤-២ នៅកីឡដ្ឋាន KMH Park។ ចំណែកក្លិបគីរិវង់សុខសែនជ័យ បានស្គាល់ជ័យជម្នះលើកដំបូងក្នុងលីគ លើក្រុមមហាផ្ទៃ លទ្ធផល ៤-១ នៅខេត្តតាកែវ។ មកទល់ពេលនេះ មហាផ្ទៃ និង គីរីវង់ នៅតំបន់បាតតារាង ដោយមាន ៥ពិន្ទុដូចគ្នា។

ការប្រកួតខាងមុខ៖ ការប្រកួតលីគកំពូលកម្ពុជាជុំទី២ នៃដំណាក់កាលទី១ នៅសល់ទេ៣ប្រកួតទៀតប៉ុណ្ណោះ ដោយប្រកួតសប្ដាហ៍ទី២០ ព្រះខ័នរាជស្វាយរៀង ត្រូវជួបជាមួយអង្គរថាយហ្គឺរ, ភ្នំពេញក្រោន ត្រូវជួបជាមួយមហាផ្ទៃ៕