ខ្សែការពារសញ្ជាតិកូឌីវ័រ-ខ្មែរ Zogbe Vireak រកបានគ្រាប់បាល់ដំបូង ជាមួយក្លិបថ្មី Police Tero FC🇹🇭 នៃក្របខណ្ឌ Thai League 2 ក្នុងនាមកីឡាករកូតាអាស៊ាន ក្រោយខ្ចីជើងពីក្លិបវិសាខារហូតដល់បញ្ចប់រដូវកាល២០២៤/២៥។
សង្ខេបការប្រកួត៖ ក្នុងនាមជាក្រុមម្ចាស់ផ្ទះ ក្លិប Police Tero FC បើកទ្វារកីឡដ្ឋាន Boonyachinda Stadium ទទួលស្វាគមន៍ក្លិបកំពុងឈរចំណាត់ថ្នាក់លេខ២ Phrae United សប្ដាហ៍ទី២៥ ក្របខណ្ឌលីគ២ថៃ។ ការប្រកួតចាប់ផ្ដើមដោយការដាក់នាំមុខពីក្រុមភ្ញៀវ Phrae United នៅនាទីទី៤០ ដោយកីឡាករ Wongsai ។ ការប្រកួតវគ្គទី២ ម្ចាស់ផ្ទះ Police Tero បានរកបានគ្រាប់បាល់តាមស្មើដោយកីឡាករ Zogbe Vireak និងបន្ថែមគ្រាប់បាល់ជ័យជម្នះនៅនាទីទី៨៥ ដោយខ្សឬប្រយុទ្ធ Namphueng ។
ការប្រកួតប្រជែងនៅលីគថៃ៖ តាំងពីចូលរួមជាមួយ Police Tero FC កាលពីដើមខែមករា Zogbe Vireak បង្ហាញខ្លួនគ្រប់ប្រកួតក្នុងលីគ ដោយបានលេងជម្រើសដំបូងបាន ៨ប្រកួតជាប់ៗគ្នា ជាមួយ Police Tero FC រកបានមួយគ្រាប់ និងរូបគេជួយក្លិបរកបានជ័យជម្នះ ៣លើក ស្មើ១ ចាញ់៤។
បច្ចុប្បន្នភាពក្រុម៖ គិតត្រឹមសប្ដាហ៍ទី២៥ ក្លិប Zogbe Vireak លេងបាន ២៤ប្រកួត ឈ្នះ ៧ ស្មើ៥ ចាញ់១២ប្រកួត ឈរនៅលេខរៀងទី១៣ ក្នុងចំណោមក្រុម១៧ និងស្ថិតលើតំបន់កាត់ចោល ៤ពិន្ទុ ហើយសប្ដាហ៍ក្រោយ ត្រូវជួបម្ចាស់ផ្ទះ Lampang FC កំពុងឈរលេខ៦ នៅលីគទី២ថៃ៕
