ក្រុមហង្សក្រហម Liverpool កាន់តែមានឱកាសខ្ពស់ក្នុងការក្រសោបជើងឯក Premier League រដូវកាល ២០២៤-២៥ ក្រោយឈ្នះ Manchester City ២-០ នៅយប់ថ្ងៃទី២៣ ខែកុម្ភៈ។ ជ័យជម្នះនេះ បានធ្វើឱ្យ ពួកគេ កើនគម្លាតនាំមុខក្រុមលេខ២ Arsenal ចំនួន១១ពិន្ទុ គិតត្រឹមសប្ដាហ៍ទី២៦។
សង្ខេបការប្រកួត៖ ក្នុងជំនួប Premier League នៅកីឡដ្ឋាន Etihad ខ្សែប្រយុទ្ធឆ្នើម Mohamed Salah រកបាន១គ្រាប់នៅនាទី១៤ មុនពេល ខ្សែបម្រើ Dominik Szoboszlai សម្រេចគ្រាប់ទី២ នៅនាទី ៣៧ ដើម្បីធានាជ័យជម្នះ សម្រាប់ក្រុមភ្ញៀវ Liverpool រកបាន៣ពិន្ទុបន្ថែមពីក្រុមម្ចាស់ផ្ទះ Man City។
បច្ចុប្បន្នភាពចំណាត់ថ្នាក់៖ Liverpool កំពុងតែរំកិលខ្លួនឆ្ពោះទៅរកតំណែងជើងឯកលីគកំពូលអង់គ្លេសរដូវកាលនេះហើយ តាមរយៈការបង្ហាញភាពខ្លាំងរបស់ខ្លួន។ យកបាន៣ពិន្ទុពី Man City ជួយក្រុមលោក Arne Slot កើន៦៤ពិន្ទុពីការប្រកួត២៧លើក ឈរកំពូលតារាង ដោយមាន១១ពិន្ទុនាំមុខ ក្រុមលេខ២ Arsenal ដែលប្រកួត២៦លើក។ Nottemham Forest ឈរចំណាត់ថ្នាក់លេខ៣ដដែល បើទោះចាញ់ Newcastle United ៤-៣។ Forest រកបាន៤៧ពិន្ទុ តាមពីក្រោយដោយក្រុមលេខ៤ Man City និងលេខ៥ Newcastle ដែលមាន ៤៤ពិន្ទុដូចគ្នា។
ឱកាសឈ្នះជើងឯករដូវកាលនេះ៖ Liverpool មានគម្លាត ១១ពិន្ទុ ហើយស្របពេលនៅសល់តែ១១ប្រកួតនឹងចប់រដូវកាលនេះ បានផ្តល់ភាគរយខ្ពស់សម្រាប់ Liverpool ក្នុងការក្រសោបយកជើងឯកលីគកំពូលអង់គ្លេសជាលើកទី២០។ មកទល់ពេលនេះ Man Utd នៅរក្សាកំណត់ត្រាជាក្រុមគ្រងជើងឯកលីគកំពូលអង់គ្លេសចំនួន២០សម័យ តាមពីក្រោយដោយ Liverpool ចំនួន១៩សម័យ។ Arsenal នៅលេខ៣ ឈ្នះ១៣លើក និង Man City ឈ្នះ ១០លើក នៅលេខ៤ ៕
