កីឡាករដ៏សំខាន់ចំនួន 2 រូបរបស់ក្រុមកាំភ្លើងធំ Arsenal រួមមានកីឡាករ Bukayo Saka និងកីឡាករ Gabriel Martinelli អាចនឹងវិលត្រឡប់មកជួយក្រុមវិញក្នុងពេលឆាប់ៗនេះ បន្ទាប់ពីរងរបួសកាលពីមួយរយៈធំកន្លងទៅនេះ។
ស្ថានភាពនៃការរងរបួសរបស់កីឡាករទាំងពីរ: កីឡាករទាំងពីររូបបានអវត្តមានក្នុងការលេងឱ្យក្រុម Arsenal មួយរយៈធំមកហើយ។ កីឡាករ Bukayo Saka បានរងរបួសសាច់ដុំ ដែលតម្រូវឱ្យមានការវះកាត់ ចាប់តាំងពីមុនបុណ្យណូអែលក្នុងឆ្នាំ 2024។ រីឯកីឡាករ Gabriel Martinelli វិញ បានរងរបួសក្នុងជំនួបវគ្គពាក់កណ្ដាលផ្តាច់ព្រ័ត្រ ជើងទី 2 ពានរង្វាន់ Carabao Cup ទល់នឹងក្រុម Newcastle United។ បើយោងតាមសារព័ត៌មាណ The Mirror បានឱ្យដឹងថា កីឡាករទាំងពីរអាចនឹងវិលត្រឡប់មកជួយក្រុមវិញ ក្នុងអំឡុងខែមេសា ឬខែឧសភា ខាងមុខនេះ។
ក្រុម Arsenal ជួបវិបត្តិរបួសកីឡាករសំខាន់ៗជាច្រើន: មិនត្រឹមតែរងរបួសកីឡាករទាំងពីររូបនេះទេ ក្រុម Arsenal ក៏កំពុងបាត់បង់កម្លាំងសំខាន់ៗរួមមានកីឡាករ Kai Havertz និងកីឡាករ Gabriel Jesus ផងដែរ។ អវត្តមានកីឡាករសំខាន់ៗប៉ុន្មាននាក់នេះហើយ បានធ្វើឱ្យលោក Mikel Arteta សម្រេចចិត្តប្រើប្រាស់កីឡាករ Raheem Sterling កីឡាករ Leandro Trossard និងកីឡាករ Ethan Nwaneri ជំនួសវិញ។
ផលវិជ្ជមានប្រសិនបើកីឡាករទាំងពីរត្រឡប់មកវិញ: ក្រុម Arsenal កំពុងត្រូវការកីឡាករ Bukayo Saka និងកីឡាករ Gabriel Martinelli មកវិញជាចាំបាច់ ដើម្បីបន្តប្រជែងយកពានរង្វាន់ Premier League នៅក្នុងរដូវកាលនេះ។ គួរបញ្ជាក់ផងដែរថា ក្រុម Arsenal កំពុងតាមពីក្រោយក្រុមលេខ 1 គឺហង្សក្រហម Liverpool ចំនួន 7 ពិន្ទុ ស្របពេលការប្រកួតលីគកំពូលមួយនេះនៅសល់ចំនួន 13 ប្រកួតទៀត៕
ប្រភព៖ GOAL
