កីឡាករ Jamie Gittens របស់ក្រុម Borussia Dortmund សុបិន្តចង់លេងឱ្យ Liverpool

យោងតាមអ្នកសារព័ត៌មានជនជាតិអាឡឺម៉ង់ Christian Falk បានឱ្យដឹងថា ខ្សែប្រយុទ្ធស្លាបរបស់ក្រុម Borussia Dortmund គឺកីឡាករ Jamie Gittens មានក្តីស្រមៃចង់ផ្លាស់ទៅលេងឱ្យក្រុម Liverpool។ កីឡាកររូបនេះបានបង្ហាញទម្រង់លេងបានយ៉ាងល្អទាំងក្នុងក្របខណ្ឌ Bundesliga និងព្រឹត្តិការណ៍ UEFA Champions League ផងដែរ ដែលធ្វើឱ្យក្លិបធំៗនៅ Premier League ចាប់អារម្មណ៍លើរូបគេ។

កីឡាករ Jamie Gittens បានចូលរួមជាមួយក្រុម Dortmund ដោយចាកចេញពីក្រុមយុវជន Manchester City កាលពីឆ្នាំ២០២០ ហើយរូបគេតែងមានក្តីស្រមៃចង់ចូលរួមជាមួយក្រុម Liverpool។ តាមរយៈការលេងបានយ៉ាងល្អ ជាមួយនឹងគ្រាប់បាល់ និងប៉ះបាល់ឱ្យមិត្តរួមក្រុមស៊ុតបញ្ចូលទីនោះ បានធ្វើឱ្យក្រុមធំៗដូចជា ក្រុម Tottenham Hotspur ក្រុម Chelsea និងក្រុម Manchester City ចាប់ផ្តើមការចាប់អារម្មណ៍។

យ៉ាងណាមិញ ក្រុម Borussia Dortmund ថាពួកគេមិនលក់កីឡាកររូបនេះក្នុងតម្លៃទាបនោះឡើយ ដោយក្រុម Borussia Dortmund បានដាក់តម្លៃយ៉ាងហោចណាស់ ១០០ លានអឺរ៉ូ។ បើទោះបីជាទីផ្សារដោះដូរកីឡាករនារដូវរងារនេះអាចនឹងពុំកើតឡើងក៏ដោយ ក៏ទីផ្សារដោះដូរកីឡាករនារដូវក្តៅឆ្នាំក្រោយនេះ អាចធ្វើឱ្យក្រុម Liverpool ចែចង់មកលើកីឡាកររូបនេះផងដែរ។

ស្របពេលដែលកីឡាករ Jamie Gittens បន្តអភិវឌ្ឍសមត្ថភាពរបស់ខ្លួននៅក្រុម Dortmund នោះ ក្តីស្រមៃរបស់គេអាចនឹងកើតឡើងនាថ្ងៃអនាគត ដោយសមត្ថភាពកីឡាកររូបនេះអាចធ្វើឱ្យគេចាប់យកឱកាសក្នុងការលេងក្នុងក្របខណ្ឌ Premier League បាន៕