ក្លិបបាល់ទាត់ អាយ អេស អាយ ដង្កោសែនជ័យ ក្លាយជាម្ចាស់ជើងឯកលីគយុវជនអាយុក្រោម ១៩ ឆ្នាំ

ក្លិបបាល់ទាត់ អាយ អេស អាយ ដង្កោសែនជ័យ បានយកឈ្នះលើ ក្លិបបាល់ទាត់ វិសាខា ក្លាយជាម្ចាស់ជើងឯក នៃការប្រកួតពានរង្វាន់ជម្រើសជើងឯកខេមបូឌានលីគយុជនអាយុក្រោម ១៩ ឆ្នាំ នៅពហុកីឡដ្ឋានជាតិអូឡាំពិក ថ្ងៃទី១២ ខែវិច្ឆិកា ឆ្នាំ២០២៤។

ការប្រកួតនេះបានបញ្ចប់ទៅយ៉ាងស្វិតស្វាញ ដោយក្រុមទាំងពីរទទួលបានលទ្ធផល ២-២ ក្នុងការប្រកួត ៩០ នាទីដំបូង។ លទ្ធផលស្មើនេះធ្វើឱ្យការប្រកួតបន្តទៅកាន់ម៉ោងបន្ថែម ១៥ នាទីពីរដង ដោយក្រុមទាំងពីរបានបញ្ចប់ការប្រកួតក្នុងម៉ោងបន្ថែមក្នុងលទ្ធផល ៤-៤ និងបន្តការកាត់សេចក្តីក្នុងវគ្គទាត់បាល់ ១១ ម៉ែត្រ។ តាមរយៈការទាត់បាល់ ១១ ម៉ែត្រកាត់សេចក្តីនេះ ក្លិបបាល់ទាត់ អាយ អេស អាយ ដង្កោសែនជ័យ បានយកឈ្នះក្លិបបាល់ទាត់ វិសាខា ក្នុងលទ្ធផល ៤-៣ ដោយសរុបគ្រាប់បាល់ ៨-៧ ធ្វើឱ្យក្លិបបាល់ទាត់ អាយ អេស អាយ ដង្កោសែនជ័យ ក្លាយជាម្ចាស់ជើងឯក។

ក្រៅពីឈ្នះពានរង្វាន់ជើងឯក កីឡាករ Emmanuel Chinonso របស់ក្លិបបាល់ទាត់ អាយ អេស អាយ ដង្កោសែនជ័យ បានជាប់ជាកីឡាករល្អជាងគេ និងជាកីឡាករស៊ុតបញ្ចូលទីច្រើនជាងគេ ស្របពេលកីឡាករ សុភាព ថៃយុត របស់ក្លិបបាល់ទាត់ អាយ អេស អាយ ដង្កោសែនជ័យ ដូចគ្នាបានជាប់ជាកីឡាករអ្នកចាំទីល្អជាងគេ។ បន្ថែមពីនេះ លោកគ្រូ ទុំ សារ៉ាយ ដែលជាគ្រូបង្វឹករបស់ក្លិបបាល់ទាត់ អាយ អេស អាយ ដង្កោសែនជ័យ បានជាប់ជាគ្រូបង្វឹកល្អជាងគេ ក្នុងពានរង្វាន់ខេមបូឌានលីគយុវជនអាយុក្រោម ១៩ ឆ្នាំ ឆ្នាំ២០២៤ នេះផងដែរ។

សមិទ្ធផលដ៏ជោគជ័យមួយនេះ បានធ្វើឱ្យក្លិបបាល់ទាត់ អាយ អេស អាយ ដង្កោសែនជ័យ ពង្រីកសក្តានុពលរបស់ក្លិបបាល់ទាត់ទាំងមូលបន្ថែមទៀតក្នុងវិស័យបាល់ទាត់កម្ពុជា ដោយចក្ខុវិស័យរបស់ក្លិប គឺដើម្បីអភិវឌ្ឍវិស័យបាល់ទាត់កម្ពុជាបន្ថែម តាមរយៈការបណ្តុះបណ្ដាលថ្នាលយុវជនឱ្យកាន់តែមានគុណភាពជាងមុន៕