កីឡាករ Casemiro អាចនឹងចាកចេញពីក្រុមបិសាចក្រហម Manchester United ឆាប់ៗនេះ។ បើទោះបីទីផ្សារដោះដូរកីឡាកររដូវរងារទើបនឹងបិទថ្មីៗនេះក៏ដោយ ក៏ក្រុម Flamengo នៅតែចាប់អារម្មណ៍ក្នុងការនាំយកកីឡាករសញ្ជាតិប្រេស៊ីលរូបនេះពីក្រុម Manchester United ផងដែរ។
ការចូលរួមជាមួយក្រុម Manchester United បន្ទាប់ពីចាកចេញពីក្រុម Real Madrid: កីឡាករ Casemiro ហាក់បីដូចជាពុំជោគជ័យឡើយ ក្នុងអាជីពជាកីឡាករនៅក្រុម Manchester United បន្ទាប់ពីចាកចេញពីក្រុម Real Madrid កាលពីទីផ្សារដោះដូរកីឡាកររដូវក្តៅ ក្នុងឆ្នាំ 2022។ នៅរដូវកាលនេះ កីឡាករ Casemiro លេងបានតែ 8 ប្រកួតប៉ុណ្ណោះ ក្រោមការដឹកនាំរបស់គ្រូបង្វឹក Ruben Amorim ដោយ 5 ប្រកួតចុងក្រោយក្នុងក្របខណ្ឌ Premier League កីឡាករ Casemiro បានត្រឹមតែអង្គុយនៅកៅអីបម្រុងប៉ុណ្ណោះ។
ការចាប់អារម្មណ៍ពីក្លិបធំៗលើកីឡាករ Casemiro: ក្លិបបាល់ទាត់ Manchester United និងកីឡាករ Casemiro ក៏បានព្យាយាមរកក្លិបថ្មីសម្រាប់ផ្ទេរកាលពីទីផ្សារដោះដូរកីឡាករកាលពីខែមករានេះផងដែរ។ បើទោះបីជាក្រុម Besikta ក្រុម Al-Nassr និងក្រុម Roma ចាប់អារម្មណ៍លើកីឡាករសញ្ជាតិប្រេស៊ីលរូបនេះក្តី ក៏ការផ្ទេរពុំបានកើតឡើងតាមគ្រោងទុកឡើយ។ យ៉ាងណាមិញ យោងតាមអ្នកសារព័ត៌មាន Jorge Nicola និង Bolvaip បាននិយាយថាក្រុម Flamengo នៅតែបន្តចង់បានកីឡាករវ័យ 32 រូបនេះក្នុងលក្ខខណ្ឌខ្ចីជើង។
ការផ្ទេរអាចនឹងកើតឡើង ប្រសិនបើដំណើរការដោយរលូន: បើទោះបីទីផ្សារដោះដូរកីឡាកររដូវរងារបញ្ចប់ទៅត្រឹមថ្ងៃទី 03 ខែកុម្ភៈ យ៉ាងណាក្តី ក៏ទីផ្សារដោះដូរកីឡាករនៅប្រទេសប្រេស៊ីលនៅបន្តរហូតដល់ថ្ងៃទី 28 ខែកុម្ភៈ ផងដែរ។ ក្រុម Manchester United អាចនឹងយល់ព្រមតាមសំណើដោយអនុញ្ញាតឱ្យកីឡាកររូបនេះចាកចេញ។ ប៉ុន្តែ ក្រុម Flamengo នឹងត្រូវពិចារណាសារជាថ្មីម្តងទៀតចំពោះការនាំចូលកីឡាកររូបនេះ ដោយពួកគេនឹងត្រូវសិក្សាលើការចំណាយឱ្យបានត្រឹមត្រូវ ជៀសវាងការខាតបង់ផ្សេងៗមិនដូចការរំពឹងទុក៕
ប្រភព៖ GOAL
