ការបង្ហាញទម្រង់លេងល្អ ក្នុងរដូវកាលនេះជាមួយនឹងកំណត់ត្រាមិនទាន់ចាញ់៖ ក្លិបបាល់ទាត់ភ្នំពេញក្រោន បន្តកាន់កាប់ទីកំពូលតារាងលីគកំពូលកម្ពុជា គិតត្រឹមសប្ដាហ៍ទី១៨ ដោយឆ្លងកាត់ ១៦ប្រកួត ឈ្នះ១៤ ស្មើ២ មិនទាន់ចាញ់សោះ និងមាន៤៤ ពិន្ទុ នាំមុខក្រុមលេខ២ ព្រះខ័នរាជស្វាយរៀង ៤ពិន្ទុ។
លទ្ធផល ៥ប្រកួតចុងក្រោយ៖ ៥ប្រកួតចុងក្រោយរបស់សិង្ហក្រហមភ្នំពេញក្រោន ដូចជា៖ ភ្នំពេញក្រោន ៣-១ កងយោធពលខេមរភូមិន្ទ, បឹងកេត ១-៣ ភ្នំពេញក្រោន, ភ្នំពេញក្រោន ៣-១ គីរីវង់, ភ្នំពេញក្រោន ០-០ ណាហ្គាវើល និងចុងក្រោយយកឈ្នះ ឡាយហ៍ ០-៥ នៅខេត្តព្រះសីហនុ។
ចំណាត់ថ្នាក់ CPL បច្ចុប្បន្ន៖ ភ្នំពេញក្រោន ឈរនៅលើកំពូលតារាងដោយមាន ៤៤ ពិន្ទុ តាមពីក្រោយដោយព្រះខ័នរាជស្វាយរៀងមាន៤០ពិន្ទ និងវិសាខា មាន៣៨ពិន្ទុ ចំណែកឯកក្លិបនៅតំបន់បាតតារាង គឺគីរិវង់សុខសែនជ័យ ដោយជាក្រុមតែមួយគត់មិនទាន់ស្គាល់ជ័យជម្នះក្នុងលីគ ក្រោយឆ្លងកាត់ ១៧ប្រកួត ស្មើ២ និងចាញ់១៥ ប្រកួត។
កក់កៅអីវគ្គ Top 6 រួចរាល់៖ ភ្នំពេញក្រោន ព្រះខ័នរាជស្វាយរៀង និងវិសាខា បានធានាកៅអី 𝗧𝗢𝗣𝟲 រួចរាល់ហើយ បន្ទាប់ពីក្រុមលេខ៧ អាយអេសអាយ ដង្កោសែនជ័យ បច្ចុប្បន្នមាន ២១ពិន្ទុ និងការប្រកួតជុំទី២ នៅសល់ ៤ប្រកួតទៀតប៉ុណ្ណោះ។ ចំណែកឯក្រុម អង្គរថាយហ្គឺ បឹងកេត ណាហ្គាវើល អាយអេសអាយ ដង្កោសែនជ័យ និង កងយោធពលខេមភូមិន្ទ កំពុងប្រជែងគ្នាយកកៅអី Top 6 ដែលនៅសល់បេក្ខភាព៣ទៀត។ បញ្ជាក់ថា ពេលចូលដល់ដំណាក់ 𝗧𝗢𝗣𝟲 ក្រុមចំនួន ៦ នឹងត្រូវប្រកួតគ្នាចំនួន ២ជើងបន្ថែមទៀត នឹងរាប់ពិន្ទុបន្តដែលសន្សំបាននៅការប្រកួត ២ជុំកន្លងមក ដើម្បីសម្រេចរកក្រុមជើងឯកនៅចុងរដូវកាល ២០២៤/២៥។
ការសម្លឹងឆ្ពោះទៅមុខ៖ ប្រកួតដែលនៅសេសសល់របស់ភ្នំពេញក្រោន ត្រូវជួប ព្រះខ័នរាជស្វាយរៀង នៅសប្ដាហ៍ទី១៩ ចុងសប្ដាហ៍នេះ ហើយបន្តជួបក្រសួងមហាផ្ទៃ អង្គរថាយហ្គឺរ និងប្រកួតចុងក្រោយនៅជុំទី២ ជាមួយក្លិប អាយអេសអាយ ដង្កោសែនជ័យ ៕
