យោងតាមសារព័ត៌មានអង់គ្លេសបានឱ្យដឹងថា អ្នកចាត់ការទូទៅរបស់ក្រុមមេឃខៀវ Manchester City លោក Pep Guardiola បានបន្តកុងត្រាថ្មីជាមួយក្រុម Manchester City រហូតដល់ឆ្នាំ២០២៦។ កុងត្រារបស់លោក Pep Guardiola ជាមួយក្រុម Manchester City សព្វថ្ងៃនឹងត្រូវបញ្ចប់នាចុងរដូវកាលនេះ ដោយលោកមានលក្ខខណ្ឌអាចបន្តបានរយៈពេល ១ ឆ្នាំទៀត។
គួរបញ្ជាក់ផងដែរថា គ្រូបង្វឹកសញ្ជាតិអេស្ប៉ាញវ័យ ៥៣ ឆ្នាំរូបនេះ ចាប់ផ្តើមដឹកនាំក្រុមមេឃខៀវ Manchester City ចាប់តាំងពីឆ្នាំ២០១៦ ដោយលោកបានជួយក្រុមឱ្យឈ្នះពានរង្វាន់ Premier League ចំនួន ៦ ដង ពានរង្វាន់ FA Cup ចំនួន ២ ដង ពានរង្វាន់ UEFA Champions League ចំនួន ១ ដង ពានរង្វាន់ FIFA Club World Cup ចំនួន ១ ដង និងពានរង្វាន់ League Cup ចំនួន ៤ ដង ស្របពេលដែលលោកបានបំបែកកំណត់ត្រាថ្មីឱ្យក្រុម Manchester City លើកពានធំៗ ៣ ក្នុងមួយរដូវកាល កាលពីឆ្នាំ២០២៣។
មុននឹងចូលរួមជាមួយក្រុមមេឃខៀវ Manchester City លោក Pep Guardiola ធ្លាប់បង្កើតស្នាដៃដឹកនាំក្រុមយក្សនៅប្រទេសអេស្ប៉ាញ Barcelona ពីឆ្នាំ ២០០៨ ដល់ ២០១២ និងចំណាយពេល ៣ ឆ្នាំដឹកនាំក្រុមយក្សនៅប្រទេសអាឡឺម៉ង់ Bayern Munich។ សព្វថ្ងៃនេះ ក្រុមមេឃខៀវ Manchester City កំពុងឈរនៅលេខរៀងទី២ នៃកំពូលតារាង Premier League តាមពីក្រោយក្រុមហង្សក្រហម Liverpool ចំនួន ៥ ពិន្ទុ ក្រោយលេងបាន ១១ ប្រកួតកន្លងមក៕
