លោក Jose Munuera Montero ដែលជាអាជ្ញាកណ្តាលកាត់សេចក្តីការប្រកួត រវាងក្រុម Real Madrid ស្មើ ១-១ ទល់នឹងក្រុម Osasuna មិនបានប្រព្រឹត្តិកំហុសឆ្គងណាមួយឡើយ ក្នុងការប្រកួតដែលផ្តល់កាតក្រហម ទៅខ្សែបម្រើ Jude Bellingham ។ នេះបើតាមការអះអាងរបស់សហព័ន្ធបាល់ទាត់អេស្ប៉ាញ (RFEF) ។
ការសម្រេចរបស់ RFEF៖ សហព័ន្ធបាល់តាត់អេស្ប៉ាញ RFEF នៅថ្ងៃទី២០ ខែកុម្ភៈ បានចេញសេចក្តីថ្លែងការណ៍ បញ្ជាក់ថា ខ្លួននឹងមិនចាត់វិធានការណាមួយឡើយ ដើម្បីដាក់ពិន័យ លើអាជ្ញាកណ្តាលវ័យ ៤១ឆ្នាំ ដែលត្រូវបាន អ្នកគាំទ្រក្លិប Real Madrid រិះគន់ ក្រោយផ្ដល់កាតក្រហម Jude Bellingham ពីការប្រកួត ដោយគិតថាកីឡាករវ័យ ២១ឆ្នាំ បានប្រើប្រាស់ពាក្យសម្បីមិនសមរម្យលើខ្លួន។
ការស៊ើបអង្កេត៖ RFEF បើកការស៊ើបអង្កេត និងត្រួតពិនិត្យថាតើ សកម្មភាពលើទីលានទាំងនោះ ជាប់ពាក់ព័ន្ធនឹងរឿងរ៉ាវជំនួញ ពីខាងក្រៅឬទេ? យ៉ាងណាមិញ សហព័ន្ធ RFEF បានចេញបកស្រាយ និងផ្ទៀងផ្ទាត់យ៉ាងលម្អិត ហើយបង្ហាញថា សកម្មភាពអាជីវកម្មរបស់អាជ្ញាកណ្តាល និងការងារ មិនជាប់ពាក់ព័ន្ធគ្នានោះឡើយ។ RFEF ក៏បញ្ជាក់ថា លោកអាជ្ញាកណ្តាល Jose Munuera Montero មិនបានបង្កកំហុស ឬក៏ហេតុផលចាំបាច់ណាមួយ ដើម្បីអាចឱ្យសហព័ន្ធដាក់ពិន័យប្រឆាំងរូបលោក នោះឡើយ។ អាជ្ញាកណ្តាលវ័យ ៤១ឆ្នាំ ក៏បានចេញមុខបកស្រាយ ដោយក្រុមហ៊ុនរបស់លោក មិនជាប់ពាក់ព័ន្ធនឹងការងាររបស់លោក ឬក៏ការទទួលបានប្រយោជន៍ ពីក្លិបណាមួយនោះទេ។
ការពិន័យ Bellingham៖ ខ្សែបម្រើ Jude Bellingham ត្រូវបានសហព័ន្ធ RFEF ដាក់ពិន័យនៅក្នុងជំនួបក្របខណ្ឌ La Liga ចំនួន២ប្រកួត ដោយរូបគេ បានប្រើពាក្យសម្តីមិនសមរម្យដាក់អាជ្ញាកណ្តាលការប្រកួត ក្នុងជំនួប Real Madrid ស្មើ Osasuna លទ្ធផល ១-១ កាលពីសប្តាហ៍មុន៕
ប្រភព៖ ESPN
