ក្លិបបាល់ទាត់ Bayern Munich ត្រៀមខ្លួនរួចរាល់ក្នុងការចូលរួមប្រជែងទិញយកកីឡាករ Kobbie Mainoo ពីក្លិបបាល់ទាត់ Manchester United។ក្នុងនោះដែរ ក្រុម Chelsea ក៏កំពុងតែចាប់អារម្មណ៍លើរូបគេដូចគ្នា។ ក្រៅពីកីឡាករ Kobbie Mainoo ក្រុម Manchester United ក៏កំពុងពិចារណាលក់ចេញកីឡាករ Casemiro និងកីឡាករ Christian Eriksen ផងដែរ។
ស្ថិតិរបស់កីឡាករ Kobbie Mainoo: កីឡាករ Kobbie Mainoo បានបង្ហាញខ្លួនក្នុងឈុតធំរបស់ក្រុម Manchester United ចំនួន 53 ប្រកួតរួចមកហើយ។ សម្រាប់ក្រុមជម្រើសជាតិអង់គ្លេសវិញ កីឡាករ Kobbie Mainoo បានជួយក្រុមឱ្យយកឈ្នះបាន 10 ប្រកួតដូចគ្នា។ យ៉ាងណាមិញ កុងត្រារបស់កីឡាករ Kobbie Mainoo ជាមួយនឹងក្រុម Manchester United នៅមានសុពលភាពរហូតដល់ឆ្នាំ 2027 ឯណោះ។
កីឡាករ Kobbie Mainoo អាចទទួលបានប្រាក់ឈ្នួលប្រសើរជាងមុន: ក្រុម Bayern Munich បង្ហាញការចាប់អារម្មណ៍លើកីឡាករ Kobbie Mainoo នៅក្នុងទីផ្សារដោះដូរកីឡាករខែមករានេះ។ អនាគតរបស់កីឡាករសញ្ជាតិអង់គ្លេសរូបនេះ ហាក់បីដូចជាមានភាពស្រពេលស្រពិល ស្របពេលក្រុម Chelsea ក៏កំពុងចាប់អារម្មណ៍លើរូបគេដូចគ្នា។ កីឡាករ Kobbie Mainoo ទទួលបានថ្លៃពលកម្មពីក្រុម Manchester United ចំនួន 2 ម៉ឺនផោនក្នុងមួយសប្តាហ៍។ ប៉ុន្តែ ភាគីសាមីខ្លួនផ្ទាល់ចង់តម្លើងតម្លៃពលកម្មយ៉ាងហោចណាស់ 20 ម៉ឺនផោនក្នុងមួយសប្តាហ៍។
ស្ថានភាពរបស់ក្រុម Manchester United ក្នុងពេលបច្ចុប្បន្ន: គួរបញ្ជាក់ផងដែរថា ក្រុម Manchester United កំពុងស្ថិតនៅលេខរៀងទី 13 នៃកំពូលតារាង Premier League។ លោក Ruben Amorim ក៏កំពុងតែត្រូវការកីឡាករ Kobbie Mainoo ជាចាំបាច់ ដើម្បីពង្រឹងទម្រង់លេងរបស់ក្រុមឱ្យកាន់តែប្រសើរជាងមុន។ ក្រុម Manchester United នឹងត្រូវមានភារកិច្ចលេងការប្រកួតបន្ទាប់ទល់នឹងក្រុម Southampton នាយប់ថ្ងៃទី 16 ឈានចូលថ្ងៃទី 17 ខែមករា ឆ្នាំ 2025 ខាងមុខនេះ៕
ប្រភព៖ GOAL
