លោក Vincent Kompany គ្រូបង្វឹកក្រុម Bayern Munich បាននិយាយថាលោកនៅតែមានកីឡាករល្អៗជាច្រើន ដើម្បីមកជំនួសកីឡាករ Harry Kane។ គួរបញ្ជាក់ផងដែរថាកីឡាករ Harry Kane បានរងរបួសសាច់ដុំភ្លៅក្នុងជំនួបជាមួយក្រុម Borussia Dortmund ដែលទទួលបានលទ្ធផល ១-១ កាលពីសប្តាហ៍មុន។
អំពីកីឡាករ Harry Kane: កីឡាករ Harry Kane រកគ្រាប់បាល់បាន ២០ គ្រាប់គ្រប់កម្មវិធីទាំងអស់ក្នុងរដូវកាលនេះ និងនាំមុខជាកីឡាកររកគ្រាប់បាល់បានច្រើនជាងគេចំនួន ១៤ គ្រាប់នៅក្របខណ្ឌ Bundesliga ក្នុងរដូវកាលនេះ។ កីឡាករសញ្ជាតិអង់គ្លេសរូបនេះអាចនឹងអវត្តមានរយៈពេល ២ សប្តាហ៍។ លោក Vincent Kompany សង្ឃឹមថាកីឡាករ Harry Kane អាចនឹងវិលត្រឡប់មកជួយក្រុមឆាប់ៗខាងមុខនេះផងដែរ។
អ្នកដែលជំនួសវត្តមានរបស់កីឡាករ Harry Kane: លោក Vincent Kompany បានបញ្ជាក់បន្ថែមទៀតថា បើទោះបីជាកីឡាករ Harry Kane អវត្តមានក្តី ក៏លោកនៅមានជម្រើសកីឡាករល្អៗជាច្រើនទៀតដូចជាកីឡាករ Thomas Mueller កីឡាករ Serge Gnabry កីឡាករ Michael Olise និងកីឡាករ Leroy Sane ដើម្បីបំពេញតំបន់ប្រយុទ្ធរបស់ខ្លួន។
ការប្រកួតបន្ទាប់របស់ Bayern Munich: ក្រុម Bayern Munich កំពុងឈរនៅលេខរៀងទី១ បណ្ដោះអាសន្នលើកំពូលតារាង Bundesliga ដោយនាំមុខ ៤ ពិន្ទុលើក្រុម Eintracht Frankfurt។ ក្រុម Bayern Munich ក៏នឹងត្រូវលេងក្នុងពានរង្វាន់ German Cup វគ្គ ១៦ ក្រុមចុងក្រោយ ទល់នឹងក្រុមការពារដំណែងជើងឯក Bayer Leverkusen ឆាប់ខាងមុខនេះផងដែរ៕
ប្រភព៖ Reuters
