ដៃគូដ៏សំខាន់របស់កីឡាករ Cristiano Ronaldo នៅក្រុម Al-Nassr គឺកីឡាករ Anderson Talisca នឹងចាកចេញពីក្រុមក្នុងពេលឆាប់ៗខាងមុខនេះ ដោយទៅចូលរួមជាមួយក្រុម Fenerbahce របស់លោក Jose Mourinho។ កីឡាករ Cristiano Ronaldo ក៏នឹងត្រូវមានភារកិច្ចជួយក្រុម Al-Nassr ប្រកួតជាមួយក្រុម Al Raed ក្នុងលីគកំពូល Saudi Pro League ឆាប់ៗខាងមុខនេះផងដែរ។
ការផ្លាស់ទៅលេងឱ្យក្រុម Fenerbahce: យោងតាមលោក Fabrizio Romano បានឱ្យដឹងថាការផ្លាស់ទៅលេងឱ្យក្រុម Fenerbahce របស់កីឡាករ Anderson Talisca អាចនឹងធ្វើឡើងក្នុងសប្តាហ៍នេះ។ លោក Jose Mourinho គ្រូបង្វឹកក្រុម Fenerbahce ក៏យល់ព្រមនាំចូលកីឡាករសញ្ជាតិប្រេស៊ីលរូបនេះដូចគ្នា។ កីឡាករ Anderson Talisca នឹងត្រូវធ្វើតេស្តសុខភាពនៅទីក្រុង Istanbul នាពេលប៉ុន្មានថ្ងៃខាងមុខនេះ។ សម្រាប់កុងត្រារបស់កីឡាកររូបនេះជាមួយនឹងក្រុម Fenerbahce នឹងមានសុពលភាពរហូតដល់ខែមិថុនា ឆ្នាំ 2026។
ការតាមយកកីឡាករ Anderson Talisca មកកាន់ Fenerbahce: ក្រុម Fenerbahce បានចាប់អារម្មណ៍ក្នុងការនាំយកកីឡាករ Anderson Talisca ចាប់តាំងពីដើមខែធ្នូ ឆ្នាំ 2024 មកម្ល៉េះ។ មូលហេតុដែលក្រុម Fenerbahce ចង់បានកីឡាករវ័យ 30 ឆ្នាំរូបនេះ ក៏ដោយសារតែលោក Jose Mourinho កំពុងមានតម្រូវការក្នុងតំបន់ប្រយុទ្ធ ដើម្បីប្រកួតប្រជែងពាក់កណ្ដាលរដូវកាលទៀត។ យ៉ាងណាមិញ កីឡាករ Anderson Talisca ក៏កំពុងតែរងរបួសផងដែរ ដោយរូបគេបានអវត្តមានចូលរួមលេងឱ្យក្រុម Al-Nassr ជាងមួយខែរួចមកហើយ។
អាជីពរបស់កីឡាករ Anderson Talisca មុនពេលទៅលេងនៅតំបន់មជ្ឈិមបូព៌ា: មុននឹងផ្លាស់ទៅលេងនៅប្រទេសអារ៉ាប៊ីសាអូឌីត កីឡាករ Anderson Talisca ធ្លាប់លេងឱ្យក្រុម Benfica ព្រមទាំងចំណាយពេល 2 រដូវកាលលេងឱ្យក្រុម Besiktas ក្នុងលក្ខខណ្ឌខ្ចីជើង។ ក្នុងអំឡុងពេលលេងឱ្យក្រុម Al-Nassr នេះ កីឡាករ Anderson Talisca មានឱកាសចាប់ដៃគូក្នុងតំបន់ប្រយុទ្ធជាមួយកីឡាករ Cristiano Ronaldo និងកីឡាករ Sadio Mane ដោយជួយឱ្យក្រុមឈ្នះពាន Arab Club Championship ក្នុងឆ្នាំ 2023 ផងដែរ៕
ប្រភព៖ GOAL
