Ten Hag និយាយបែបនេះ ក្រោយមានការរិះគន់លើក្រុម Man Utd

អ្នកចាត់ការទូទៅរបស់ក្រុមបិសាចក្រហម Manchester United លោក Erik ten Hag បានឆ្លើយតបអំពីពាក្យចចាមអារ៉ាមទាក់ទងនឹងតំណែងរបស់លោក ដោយលោកបាននិយាយថាវាមិនមែនជាការពិតនោះឡើយ។ បន្ទាប់ពីដឹកនាំក្រុមបិសាចក្រហម Manchester United ក្នុងរដូវកាលថ្មីនេះ ដោយកំពុងឈរនៅលេខរៀងទី១៤ នៃតារាង Premier League បណ្ដោះអាសន្ននោះ លោក ten Hag បានបដិសេធរាល់ចំណុចអវិជ្ជមានទាំងស្រុងលើប្រព័ន្ធផ្សព្វផ្សាយ និងសារព័ត៌មានបានចុះផ្សាយ។

ក្នុងសន្និសីទកាសែត លោក Erik ten Hag បានបញ្ជាក់ថាថ្នាក់ដឹកនាំក្លិបបាល់ទាត់ផ្ទាល់ ព្រមទាំងរូបលោកនៅតែបន្តសហការគ្នា បើទោះបីជាក្រុមទទួលបានលទ្ធផលមិនល្អនាពេលថ្មីៗនេះ ថែមទាំងទើបតែចាញ់ក្រុម Tottenham Hotspur ក្នុងលទ្ធផល ៣-០។ លោក Erik ten Hag ថែមទាំងអះអាងថាថ្នាក់ដឹកនាំក្លិបនៅតែបន្តគាំទ្រការដឹកនាំរបស់លោកផងដែរ។

គួរបញ្ជាក់ផងដែរថា បើទោះបីជាលទ្ធផលបានធ្វើឱ្យអ្នកគាំទ្រខកចិត្តយ៉ាងណាក្តី ក៏លោក Erik ten Hag ជឿជាក់ថាលោកនឹងស្តារស្ថានការណ៍ឱ្យប្រសើរឡើងវិញ។ លោកនៅតែបន្តរៀបចំយុទ្ធសាស្ត្រថ្មីជាបន្តទៀត ដើម្បីអភិវឌ្ឍទម្រង់លេងរបស់ក្រុម ក៏ដូចជាកីឡាករផងដែរ។ ស្របពេលដែលការប្រកួតបន្ទាប់ ក្រុមបិសាចក្រហម Manchester United នឹងត្រូវប៉ះគ្នាជាមួយក្រុម Brentford លោក Erik ten Hag ជឿជាក់ថាក្រុមរបស់លោកនឹងធ្វើបានល្អក្នុងការប្រកួតនេះ៕