Viktor Gyokeres បង្ហាញសមត្ថភាពដ៏អស្ចារ្យ ហើយអ្នកគាំទ្រចង់ឃើញរូបគេនៅ Man Utd

កីឡាករ Viktor Gyokeres បានបង្ហាញសមត្ថភាពយ៉ាងអស្ចារ្យក្នុងការស្វែងរកគ្រាប់បាល់សម្រាប់ក្លិបបាល់ទាត់អាជីព និងក្រុមជម្រើសជាតិស៊ុយអែត បន្ទាប់ពីរូបគេរកបាន ៣២ គ្រាប់តាមរយៈការលេង ២៤ ប្រកួត ហើយថ្មីៗនេះរូបគេបានរកគ្រាប់បាល់បានរហូតដល់ទៅ ៤ គ្រាប់ ក្នុងជំនួបដែលក្រុមជម្រើសជាតិស៊ុយអែត យកឈ្នះលើក្រុមជម្រើសជាតិអាស៊ែបៃហ្សង់ ក្នុងលទ្ធផល ៦-០។

តាយរយៈការបង្ហាញសមត្ថភាពយ៉ាងអស្ចារ្យនេះ អ្នកគាំទ្រជាច្រើនគិតថាកីឡាករវ័យ ២៦ ឆ្នាំរូបនេះ នឹងចាកចេញពីក្រុម Sporting ក្នុងពេលឆាប់ៗ ស្របពេលដែលរូបគេកំពុងមានព័ត៌មានចចាមអារ៉ាមក្នុងការចូលរួមជាមួយក្រុមបិសាចក្រហម Manchester United បូករួមទាំងក្រុម Bayern Munich និងក្រុម Arsenal ក៏កំពុងតែចាប់អារម្មណ៍លើរូបគេផងដែរ។

យ៉ាងណាមិញ កីឡាករ Viktor Gyokeres បាននិយាយថា រូបគេចង់លេងឱ្យក្រុម Sporting រហូតដល់ដំណាច់រដូវកាលនេះ មុនពេលដែលរូបគេគិតពីអនាគត។ ការចូលរួមរបស់អតីតគ្រូបង្វឹករបស់ Sporting លោក Ruben Amorim ជាមួយក្រុមបិសាចក្រហម Manchester United ក៏អាចជាកូនសោរដ៏សំខាន់ក្នុងការនាំយកកីឡាករសញ្ជាតិស៊ុយអែតរូបនេះមកកាន់ទឹកដី Old Trafford ដូចគ្នា។

គួរបញ្ជាក់ផងដែរថា កីឡាករ Viktor Gyokeres កំពុងនាំមុខជាកីឡាករដែលរកគ្រាប់បាល់បានច្រើនជាងគេក្នុងព្រឹត្តិការណ៍ Nations League ព្រឹត្តិការណ៍ UEFA Champions League និងលីគកំពូលព័រទុយហ្គាល៕